تحارب الحب

موضوع: تحارب الحب الإثنين مايو 14, 2012 10:55 am

قصتي الأولى ... هذه القصة جلست لسنتين ارسمها في خيالي ...... قصتي تدور بداية أحداثها في مدينة جدة تلك المدينة التي تميزت بحضارتها فستنشق ابطال قصتي جوها الممزوج بالحضارة والأصالة ربما ما يعرفه الجميع عن اهل جدة الأنفتاح الشديد ولاكن هناك طبقة لازالت محافظة ع بيئتها النقية والمتماسكة تعالوا معي وابحروا بين احداث قصتي ...
ديمة: عمرها 18 شكلها : مممممم شعرها طويل لركبها ومو ناعم مرة لونها ابيض وبياضها حلو عيونها واسعة ورموشها كثيفة الي يشوفها يحسبها مكحلتها جسمها حلو ولبسها احلى صفاتها بنت مجتهدة مررررة وذكية هادية وعاقلة وحنونة ع الصغار خجولة وصداقتها مو مرة كثيرة اكثر صديقاتها قرب لها رجاء ودي البنت اتزوجت وانشغلت عنها والثانية هيفاء وماتت قبل 3 سنوات
........ العشاء ديمة تذاكر كالعادة الأخت تالت ثنوي ومحد قدها
يرن الجوال ... تطالع الرقم ( المزعج الغالي ) طبعا دا اسم اخوها مازن أصغر منها بسنة وحدة عمره 17 شكلة جنااااااان ابيض مررررة وعيونه واسعة وعسلية وشعره بني ناااااعم الى رقبته وهو حتى احلى منها كنه بنت من جماله الي طبعا مو عاجبه لأنو سبب مضايقة البنات له في المولات هو طبعا مايحب الحركات دي رغم انو رومنسي مررررررة بس محترم
ديمة- ردت نعم.. بحدة شوية
مازن _ هلا والله بأختي الغالية القاطعة
ديمة في نفسها ( اشبو دا انهبل مني معاه في البيت ) لا والله يا شيخ مهي غرفتي جنب غرفتك ولا فقد الذاكرة
مازن : هههههه ايش بتسوي دحين
ديمة اذاكر .... بعصبية
مازن من متى الشطارة ؟؟؟
ديمة طبعا عصبت وقالت ... انت واحد رايق وفايق وفاضي وتموت ع تضيع الوقت والفلوس لو عندك شي قدامك ربع ساعة بس تتكلم فيها معاي في الغرفة ولا انقلع
مازن رد بصوت تعبان .. دحين تبغيني اقوم من السرير والبس الشبشب (الله يكرمكم ) واقوم واقف وامشي لمن البا.... طبعا رخت في وجه جبلها المرض
دخلت دينة اخت ديمة اصغر منها بسنتين وعكسها مرة تحب الإزعاج بكل انواعه وتعشق السوق لكن قلبها طيب واعصابها شوية مفلوتة وهاذي الصفة تخليها هي و مازن طول الوقت يتضاربوا هي تخينة شوية لكنها قمر شعرها بني ناعم لنص ظهرها وعيونها بنية قالت.... ليه معصبة ؟؟؟
ديمة: أخوك البقرة يتصل من الجوال وقاعد يستهبل
دينة: ليه هو فين ؟؟؟
ديمة : في غرفته !! تقولها بعصبية
تضحك دينة والله مازن دا شي عجيب
ديمة ليه ؟؟ دينة حركاته الهبلة ولا كولو كون لمن يتضايق من البنات لمن يأشروا عليه أو يعجبوا فيه
ديمة بالعكس كدا احسن عشان ما يتعب تعيسة الحظ الي حتقبل فيه
دينة: ليه تعيسة حظ ؟؟
بالعكس حتعيش في جو رومنسي ما ينتهي....
قعدوا الإثنين يحشو في اخوهم الي مايحب من البنات غيراخواته وخاصة ديمة بس طبعا مولدرجة انو مايتزوج بس هو شعاره ( كما تدين تدان ) ويخاف يحب وحده وقصده شريف يجي واحد ويلعب بشرف اخواته وهذا الشي مخليه يكبر في نظر أبو وأعمامه وخيلانه وكل واحد يدعي انو وحده من بناته تكون من نصيبه
ديمة حبت تغير الموضوع: ايش الي في الكيس ؟؟
دينة شبس وميرندا .. تبغي ؟؟
ديمة أكيد من زمان >>فرصة ثمينة<< ما شتريت بس مين جابو ماشالله من دون ماتطلبي ؟
ضحكت دينة وقالت : مروان لأنو امس سلفته خمس ريال وقالي انو ماراح ياكل في المدرسة ويشتريلي شبس وعصير بس الكذاب راح اخذ من بابا واشترى
ديمة: ههههههه وما جبلنا ؟؟
إلا هو يقدر يروح البقالة وما يشتري لدكتورة ديمة قالت دا الكلام دانية وهي داخلة وتعطي ديمة الكيس حقها
(مروان أخوهم عمره 15 سنة سمين شوية بس نشيط وحيوي وفرفوش وكمان ما شالله حلو ويجنن اسمر سمار خفيف عيونه واسعة وشعره بني محمر زي دينة مرررة في الصفات والشكل كمان قريب بس لايقارن بجمال أخوه ابدا رغم انهم الإثنين ملفتين لنظر من جمالهم دانية هاذي ينطبق عليها المثل ا ( جات تطل غلبت الكل ) ماشالله عليها بنت تجنن شعرها أشقر وعيونها خضر وجسمها جنان ومؤدبة وخلوقة لكنها جريئة ولا تطيق أحد يغلط عليها مهما كان وعمرها 14 سنة )
قالت دانية بسخرية يابنتي متى حتطلعي من الصومعة دي الناس راحت وجات وماتت وولدت وانتي جالسة هنا ولانتي دارية عن أحد
ديمة بغرور ... انا جالسة هنا عشان أرفع راس بابا وابني نفسي مو زيكم
دينة والله حبيبتي نحن عايشين حياتنا وبابا الله يخليك له أنتي ومازن و مروان ما شالله دوافير مانقدر عليكم ههههههه
دخل مروان و عامل نفسه معصب قولي ماشالله وإذ تبغي تحسديني احسديني بس بعد ما أموت
دانية وايش راح تستفيد بعد ما تموت
مروان واليه تحسدني دحين واتعذب بقية حياتي
يدخل مازن وليه ياخوية ما تبغى حبيبة البي تعذبك>>داخل عرض<< خليها تطلع حرتي فيك
مروان دحين أنت يا عنترة في أحد جاب سيرة عبلة وهو يأشر على ديمة (وهي مهي معاهم ) أنا أتكلم مع دينة
يضحكوا كلهم على غباء أخوانهم
ويقول مازن :لا لو دينة أحسلك أنها ما تحسدك ترى عينها والقبر على طول
دينة: لا والله طيب يابو عين باردة شوف مين راح يعمل لك الكيك يوم الإثنين لأصحابك
مازن حتى لو عملتيه ماراح ادخله لهم اخاف يموتو عندي وابتلش فيهم
ديمة يعني دي سبه ولا مدح * قالتها وعينها ع الكتاب *
مازن: والله عاد يا أختي العزيزة لمن تطالعي فينا حتعرفي اذا كانت مدح ولا سب وانتي من يوم ما دخلت وانتي عينك ع الكتاب إلي يشوفك يقول خلاص دي البنت حتألف موسوعة بكرة
ديمة: والله لو راح أألف موسوعة راح تكون عنك
مازن : من جد والله لدي الدرجة أنا كائن غريب
مروان: أكيد اجل في واحد بالغباء دا والهبل يمكن عندك صواميل مفتوحة في دماغك وديمة لمن راح تسير دكتورة بإذن الله راح تعالجك صح ؟؟
مازن:والله ياا خوية يا ولد امي وابوية أنا لمن انولدت ما كان في شي بس من يوم ما جيت صدموني لمن قالو دا الثور اخوك (لانه تخين )
وطبعا كانت الحرب البيتية المليون ناوية تقوم والحمدالله